JAPAN DU MYU SHA NI N GUN MADUN
September (14) bat Manga
Japan Mungdan du Wunpawng Myu Sha ni gaw September (13) ya shan maga hkying (3:00 - 4:00pm) ten Tokyo mare Shinakawa na myen rung shawng kaw n gun madun ai lam galaw lai wa sai hpe na chye lu ai. N dai n gun madun lamang hpe Japan du Jinghpaw Wunpawng Myu Sha Hpung hte Japan du laga myu sha hpung ni kawn woi awn galaw ai re lam mung na chye lu ai. N dai zawn n gun madun ai lam a madung yaw shada lam gaw, ya ten myen asuya hpyen kawn Jinghpaw Wunpawng Myu Sha yawng hpe masing kaba jahkrat nna amyu shamyit roi rip zingri, sat nat ai lam hte hpyen n gun laba hte gasat ai sha n nga, tara tawt lai nna shingja lak nak ni hte Jinghpaw Myu ni hpe gasat shamyit nga ai lam ni hpe ninghkap ai re lam hpe mung chye lu ai. Matut nna Thein Sein asuya hpang de Jinghpaw Mung, Sam Mung maga de majan hpaw nga ai myen hpyen n gun ni hpe mung dawm la hte mung masa lam hpe rap ra ai hku bawngban sa wa na, htawng e rim sharen da hkrum ai ni hpe shalawt ya na matu hpyi shawn lai wa sai lam shiga na chye lu ai. N dai zawn myen asuya rung shawng de n gun madun ai lam hta KNO Japan hte Japan du munghpawm amyu sha ni yawng marai (100) jan sa du shang lawm lai wa sai lam hte shata shagu prawt (13) ya shani n gun madun mat wa na re lam hpe mung matut na chye lu ai.
