MYEN DAWNGHKAWN HTE RAU
Ndai sumla hpe “Myen dawnghkawn hte rau” nga ai ga baw hte email rau shalai ya ai lam hpe na chye lu ai majaw, ndai hte seng nna sang lang dat ai.
Ndai sumla gaw, mungkan shara shagu na Florida, USA kaw sa du shanu nga ai mungdan ni hte USA ni rau hkrum zup let tinang mungdan na htunghkying nga sat nga sa ka manawt, labau hte malu masha ni hpe kaga mungdan ni chye hkra shada da kanawn mazum hpaji la mai na matu (mung masa nlawm ai/non-political event) Jacksonville, Florida kaw May shata 2012 hta galaw ai World Of Nations annual event (WON) hta gayat da ai sumla rai nga ai. Ndai 2012 WON gaw 20th lang ngu na rai nna Munghpawm Myen mungdan (Burma) hku nna shawng nnan shang lawm ai hku re. Ndai kaw anhte Jinghpaw Mungdan (Kachinland) ngu nna nmai shang lawm shi ai aten naw re ai majaw anhte yawng shanu nga ai tara shang mungdan Myanmar (Burma) ngu ai hpe Kachin Development Foundation (KDF) hku nna sponsor galaw nna anhte Jinghpaw Wunpawng sha ni a lam hte htunghkying hpe mungkan ting grau chye wa hkra ngu ai yaw shada ai lam hte woi awn shang lawm wa sai hku re.
Ndai WON hta e anhte Jinghpaw Wunpawng sha ni a htunghkying bu-hpun mawn sumli, htawngka ka manaut hte labau kadun ni madun nna mung, malu masha ni dut nna mung KDF hte Tsinyam a matu mung ja gumhpraw alu tam ai lamang hpe mung galaw wa sai hku re. KDF hku nna ndai World of Nation (WON) hta Munghpawm Myen mung (Burma) hpe sponsor galaw ai majaw KDF ningbaw langai hku nna ya yang Burma a tara shang dawnghkawn (Florida mung up asuya galaw ya ai) hpe lang ra ai hku re. Ndai sumla hpe Face Book kaw bang da ai kaw nna shaw la nna email hte “Myen dawnghkawn hte rau” ngu ai chye na shut na zawn re ai ga baw hte shalai ya taw nga ai lam hpe na chye lu ai majaw sang lang dat ai lam re nngai.
Ndai WON hta KDF hku nna Burma hpe shawng nnan sponsor galaw nna shang lawm ai majaw htawm hpang de ndai WON hta Myen mungdan hku nna shang lawm mayu ai uhpung, amyu baw sang ni yawng gaw KDF a ahkaw ahkang hpe shawng hpyi ra na hku rai sai. 2012 WON hta KDF woi awn let Burma camp hku n na Jinghpaw, Myen, Hkang hte Kayin hpu nau ni shang lawm ai.
Amyu sha lam yan hta,
Bawmwang Jadan Li
KDF Ningbaw
