MYIT YU GA, MYIT HKRUM GA
Hpu Nau myit su ni e, ya yang na mung masa lam yan hpe nau nchye na shi ai sha laika majoi hkum shagun, KIO/KIA gaw majan hpe grai ra sharawng nna gasat nga ai nre, du daw sai hkaw nbyin na matu jahtum du hkra saboi ntsa kaw jahkrup ai lam htum hkra sharang nna galaw ngut sai, nmai byin ai majaw ya na zawn gasat ra ai she re. Bai, Sam, karean hte Mon ni simsa lam jahta ai gaw "pamana" hku nna hkrum shaga ai lam she rai na re, tinang ra sharawng ai lam ni hpe sa tang madun ai lam she rai na re, kaja wa simsa lam (peace-talk or cease-fire) hpe myit hkrum mat ai rai tim jahkring mi na matu she rai na re, UNFC hte Myen Asuya ni sha njahta dingsa gaw myen mung jet ai simsa lam lu na nre.
Nang ra ai Sim Sa lam gaw kaning re sim sa lam rai kun? Tinang ra ai ahkaw ahkang nlu ai sha, myen wa a dip sha ai, up sha ai kata kaw rawng nga nna sim sa ai gaw hpa akyu nga a ta? Dai majaw kaning re Sim Sa lam hpe ra sharawng ai hpe myit su wa nang ngai atsawm sha naw myit yu ra na re, gasat gala lam nnga ai hpe simsa sai ngu tsun lu na kun? Awng San Kaw mung shi a democracy bawng masha ni lawt na lam chyu sha tsun, amyu kaji ni shani shagu sat, nat, zingri zingrat hkrum, let hprawn koi yen hkawm ai hpe gaw nau wa nkam tsun, dai i Myen mung a ningbaw, myen mung hpe up na wa, Myen gaw Myen sha re.
Bawng ban ai hku jin hkra galaw ngut sai, myen a masu ai hpe mung nau wa law law lang hkrum sha lai wa sai, dai majaw myit su wa nang ngai anhte Jinghpaw amyu ni yawng gaw KIO/KIA a woi awn sa wa nga ai mung masa lam yan hta rau nsen langai hte madi shadaw sa wa ga, Karai Kasang gaw anhte maga tsap nga ai, majan ngu ai gaw asak apnawng ai lam loi gaw nga ra na re.
Gap hkat ai hte sha mung masa awng dang na ngu myi di chyip ntsun lu nga ai, gap hkat ai gaw mung masa ku ntsa de du wa na matu, anhte ra ai lam myen ni myit hkrum wa na matu, bawngban hpawng byin wa na lam de ganawng sa ya ai leng hte bung nga ai. Ten du jang jahkring kau na re, mung masa bawngban ai lam hpe mung nsim nsa galaw nga dingya re. Dai ni du hkra KIO hta lai nna kadai hpung wa Kachin ni a lawt lu lam galaw nga ma ta? Gara wuhpung wuhpawng wa Kachin ni a matu mung masa galaw nga ma ta? NDA, KDA hte kaga Pyitu Tsit (n-gawn hpyen) ni law law nga tim kachin ni yawng lawt na lam kadai wa myit nga, galaw nga ma ta? Tinang lu lawm lam chyu sha myit nga ai hkrai, myen a shingna tai let KIO hpe jahpyak dingbai dingna jaw rai nga ai, KIA hpe gasat ai hta pyi tatut shang lawm taw nga masai. Dai ni KIO chyu sha amyu sha yawng a matu ngang ngang kang kang tsap let yawng a lawt lu lam hpe myit ningchyan shaw woi awn sa wa nga ai re.
KIO/KIA ngu ai nnga yang anhte Jinghpaw wunpawng ni ngwi ngwi pyaw pyaw hte nga lu na nang shadu nga nni? Dai majaw mara mu na malai myit hkrum kahkyin gumdin lam de she jawm sa wa ga, annau ni hpe hka wa shai wa shangun ai baw sumprat hpyen ma hkra hpe jawm ninghkap ga, Jinghpaw shada nmadi shadaw yang myen hpang maga lawm yang nang lawt lu na shadu nga nni? Dingg hta ga e gyit hkang ai ma hkra hpe Sum Sing Mungdan e mung gyit hkang da na lam chyum mungga hta rawng nga ai.
Gum shem Asuya ngu ai gaw gara wa mung shanhte a Arna (ahkaw ahkang tingnyang) hpe loi loi hte galoi mung nkam tat ai, hpyen asuya ngu ai gaw shi hte maren ja lu ai wa hpe she hkrit ai, mung masa bawng ban ai hku lu na rai yang Awng San Kaw moi jau jau lu sai, Ra Lata Poi pyi dang sai NLD hpe Arna (ahkaw ahkang tingnyang) galoi ap a ta? Dai majaw ndai hpyen asuya hpe gaw bawng ban ai hte sha nmai ai majaw ya na zawn gasat ra ai re. Ganing Re Simsa lam Hpe Nang tsun mayu a ta? Laiza De sa nna sa tsun dan rit, yawng la nga ma ai.
Hkawng Lum
