KIO NINGBAW NI HTE MYU SHA NI MYIT YU GA
Ya yang Myen asuya ni gaw shanhte Myen hpyen dap ningbaw ni gaw shanhte asuya dap kata ni hkan KIA gaw nkaja ai, nhkru ai, "Tawng-Chyan-Tu" damya ni re, mungdan asuya a nambat langai (1) jebat hpyen re, dai majaw gasat kau ra ai nga nna shani shagu nsim nsa hkaw tsun let nkaja ai masa ni hpe dawk bang ya taw nga ai hpe na chye lu ai. Jinghpaw mung de mung hpyen n-gun jat tik tik rai nga ai. Dai hta maga mi de gaw Thein Sein Asuya ningbaw ni gaw KIO/KIA hte simsa lam lawan galaw na matu lang hte lang kasa ni dat nna shakut nga ai ten re. Ndai lam lahkawng hpe yu yang hpyen dap hte ya na Thein Sein asuya gaw kaga ga rai nga ai hpe mu mada lu nga ai, hpa majaw nga yang asuya a policy hpe hpyen dap gaw nhkan nang ai hpe asan sha mu mada lu nga ai.
Dai daram Jinghpaw a lam nkaja ai hku shani shana tsun shahpoi let shanhte dap kata ni hta shani shana KIA n kaja ai lam hkrai tsun let masa dawk bang nga ai hpe mi maga mi de simsa lam la ga nga ai gaw mani hpa rai taw nga ai. Asan brang lang masu nga ai hpe mu mada lu nga ai. Jet ai Simsa lam hpe shaga taw nga ai nre hpe asan sha mu mada lu nga ai. Thein Sein wa Indonesia Asian zuphpawng hta RFA hpe tsun ai hta KIA gaw "Tawng-Chyan-Tu" ni yawng hpe gahkyin gumdin la nna mung masa jahta masu let mungdan hpe woi gumlang nga ai, mung hpawm kaw na garan pru mayu ai myit jasat re nga tsun lai wa ai. Tsun mayu ai gaw: UNFC ngu ai gaw "Tawng-Chyan-Tu" ni jawm hpaw shabawn da ai hpung re ngu ai hpe asan sha ndau dat ai lam rai nga ai, dai hpung a ningbaw gaw "U Nban La" re nga nna mung bai kahtap tsun wa ai. UNFC hte nkam jahta ai ngu ai hpe asan sha htawng madun ai lam rai nga ai. Ndai gaw Thein Sein wa a KIO ntsa asan sha mu mada ai lam rai nga ai.
Dai majaw ndai myen a simsa lam woi jahta ai lam gaw myit san seng ai lam hte jahta ai nre hpe asan sha mu mada lu nga ai. N dai gaw simsa ai ladat hte laknak lang hpung ni hpe shamyit kau na ngu ai lam rai nga ai. Dai majaw KIO/KIA hte kaga amyu baw sang lak nak lang hpung ni yawng gaw gap hkat ai lam hpe gara hku mung nmai jahkring kau na masa pru nga ai, shanglawt pandung du ai shani du hkra gap let mung masa jahta ai ladat hpe matut manoi lang mat wa yang she grau mai kaja na re ngu nna mu mada ai law.
