MYEN NI KIO GINJAW DE KASA BAI DAT
October (31) bat Langai,
Wunpawng Mungdan Shanglawt Asuya hte hkrum shaga na matu Myen Asuya gaw KIO de kasa bai dat sai lam na chye lu ai. N dai lang hta myen asuya ni gaw Nawku hpung woi sara ni hpe shanhte ra ai kasa tai ya na matu hte shanhte hpang maga tsap ya na matu nsim nsa asawng shakut nga ma ai lam na chye lu ai. Lai wa sai bat hta October (27) ya shani Manmaw de na myen asuya dat ai hpung Sara (2) Laiza Ginjaw de du sa wa ai lam chye lu ai. Kata lam hpa baw ni bawng jahta ai lam ni hpe gaw tup hkrak nchye lu tim ndai lam gaw Myen a jahtum na ladat rai sai lam hpe chye lu ai. Makam masham Hpung woi Sara ni hpe jai lang yang awng dang na re ngu myen asuya ni kawn hkam la na masa rai na re. "Myen a nshawp ai, hkalem hkalau ga hpe KIO ni galoi mung kam sana nre, kadawng bang sana nre, anhte mahkrum madup grai law mat sai" nga nna KIA salang langai tsun wa ai. Ya na zawn sum wa na tai jang manang wa labawp manat let naw, shingdu yin rai jang manang wa hpe nyawp hkra re ai akyang gaw moi kaw na myen a ladat rai nga ai nga na mung tsun sang lang dan lai wa ai.
