COMMENT LAIKA HPE HTI YU GA
Ntap bum kaw na myen ni bai htingnut mat wa ai lam na chye lu ai majaw Karai Kasang a chye ju hpe shakawn ai law...
Dai ni gasat nga ai majan hpe mare kaw nga nga ai myen salang ni gaw, tara nshang ai majan re nga nga ma ai. Hpa galaw na rai yang mung Rap Daw kaw nna daw dan galaw ai baw re. Dai majaw ya na myen ni gasat ai lam gaw Than Shwe wa chying lau ai bungli re nga tsun jahta nga ma ai.
Majan pa hta Dadu lanak lang ai hpe mung, n galaw ging ai bungli re nga myen salang ni jahpyak nga ma ai. Tara nshang ai, tara nlang ai majan gaw hkrat sum chyalu sha rai nga ai. Dai majaw myu tsaw share shagan ni yawng n'gun dating, myit nden shaja nna, ntara ai hpen ni hpe dang hkra shakut gasat nga ga. Karai anhte maga de lawm nga ai.
Nadai lam ni hte seng nna daini Rap Daw kaw lawm nga ai Jinghpaw kasa ni hpa rai zim nga ma ta? Hpung woi ni a mying dut sha nna kan wang sha na sha chye mat sai i? Tinang a majaw dinghku nta masha, tinang hte seng ai ni hpe myi man shaka ya ai lam re hpe n dum mat sai i? Karai Kasang a masha ni hpe dut sha ai wa nang, myen myi man hpe sha yu nna Karai Kasang hpe nhkrit ai i?
Aung San Kaw mung hpa rai zim nga a ta? Tein Sein hte hpa baw jahkrup hkat ma ai kun? Lama mi pawng sha hkyen ai rai kun? Hpa rai shi a bawng masha ni lawt na chyu sha tsun nga nna, Jinghpaw ni hkrum hkra nga ai hpe nchye ai zawn nga nga ai rai? Hpen yen ni hpe kade lang yu garum sani? Myen gaw myen sha rai nga ai nrai ni? RFA san htai ni hpa rai zim nga ma ta? Myen ni nau sum wa ai majaw n wam san mat sai i? Myen maga tsap ai i? Kaning re media rai kun?
Hkring sa mat sai myen du kaba langai tsun ai, " dai ni nanhte Jinghpaw ni hkrat sum ai lam gaw myit nhkrum ai lam re" nga ai. Shi matut tsun ai hta " nanhte a kata na ni sha nanhte a kata lam ni hpe anhte hpe tsun dan ai re" nga ai.
Dai lam ni gaw teng sha byin nga ai re. Lai sai ten, "Galoi mi she" sumla hkrung manghkang byin ai shaloi mung myen ni hpa pyi nchye ai, myen ni a labu matu kaw kap sha nga ai Jinghpaw Slg...... wa kawn chye wa ai sha re.
Nawku hpung kata hpung sara ni kaning re tara hkaw ai lam ni, myen kawa ni hpe shi htaw ai mung anhte a kata kaw na sha rai nga ai. Hpu nau wa nang dai zawn galaw nna kan kade hkru sata? Na a nta masha ni, nanag hte seng ai amyu ru sai ni kade wa bawng ring wa nga a ta? Tinang amyu hpe dut sha ai wa, nang hpe Myen ni kade daram wa kam nga ma ta? Nang yup pyaw sha mu rai nga ai i?
Lahkam mi re kan a matu na a dinghku, na a kasha ni a labau ntsawm hkra hpa rai dai zawn mana bu ai, nmyit yu ai bungli galaw nga nta? Myen shat hta lai nna, kaga lu hsa nchye tam sha mat sani?
Rap daw kaw lawm nga ai ni, tinang amyu a matu hpa n lu galaw na rai yang, rap daw kaw na lawan ai hku pru mat yang grau kaja nhten?
Hpang rai nhkrat ai.
Labau tsawm nga u ga!
