Jinghpaw buga masha langai, bawm hte rau rim hkrum
Jinghpaw mungdaw kata, Myen hte Shanglawt lapran majan bai byin na zawn shada hpyen masa shachyen hkat nga ten, Manmaw ginwang na Jinghpaw buga masha langai hpe bawm hte rau, ndai laman, Myen pyada ni rim kau sai re.
N’Mawk mare lahta Wawang Kumbang ngu ai kahtawng na dinghku la, Slg. N’hkum Bawk Lawn hpe pyada ni rim ai hta, shi nta hte sun langai kaw makoi tawn ai bawm (remote bawm) law law hpe mung lu rim ai lam, rim hkrum ai salang wa hte ni nawn ai ni tsun ai.
Ndai shata 13, lai wa sai bat kru ya jahpawt hkying 11 ram hta, Laiza-Manmaw lam lapran, kani hkap sawk nga ai N’Mawk kani jep pyada (mu-yit) ni gaw, lai hprang Slg. Bawk Lawn hpe hkap jahkring jep dat yang, shi a mawdaw saike kaw Miwa nga-kabai-bawm tawng 5 hpe mu ai lam, chye lu ai.
Dai hpang, Slg. Bawk Lawn hpe, shi nta Wawang Kumbang de pyada ni rim woi mat nna, san jep yang, shi nta mamdum npu e makoi tawn ai remote bawm 15 hpe lu rim nna, shi hpe matut zingri zep dat yang, Myu Tit makau, sun langai kaw makoi tawn ai remote bawm law law hpe bai mu tam lu ai lam, matut chye lu ai.
Ndai mabyin a majaw, Slg. Bawk Lawn hte shi dum nta masha yawng hpe pyada ni, N’Mawk hkyuk de rim majaw woi mat ai raitim, kade n na yang Slg. Bawk Lawn a madu jan hte kasha ni hpe gaw bai dat dat ai lam, KNG sagawn chye lu ai.
KNG
