Myitkyina e wan n sa mat ai majaw buga masha ni jam jau nga
| Jinghpaw mungdaw, Myitkyina mare daju na lawk nkau e, myihprap wan lu nga dingyang kawn akajawng n lu mat ai lam a majaw, buga masha ni jam jau hkrum nga ai lam, chye lu ai. Ndai zawn byin wa ai lam gaw, lawk nkau e, shawng e Transformer n tawn ai sha, wan jawn taw ai kawn, lawk salang ni gaw lawk kata e, transformer tawn na matu, lawk masha ni hpe shadut wa ai ten, hpa ahkyak n la ya ai majaw, ya na zawn, wan di kau ya ai re lam, Kachinzu lawk na buga masha langai tsun dan wa ai. Shi matut tsun ai hta, lawk salang ni Transformer tawn na matu, wan la tawn ai, nta dinghku langai mi, 150,000 bang ra na, dai hpe, kalang mi 50,000 garan nna, 3 lang mai bang ai ngu matsun wa ai ten, lawk kata e, yak hkak ai dinghku ni malawng re ai majaw, n dang di na zim nga ai ten, ya na zawn wan n sa mat ai re lam, matut tsun dan wa ai. Ya yang, Myitkyina mare kata na lawk shagu ngu na daram hpe Wunpawng Mungdan Shanglawt Hpung (KIO) a Buga Company kawn lit la nna, wan jaw ya nga ai re. Ndai lam hte seng nna, buga company na rung magam gun ni hpe san yu yang, ndai lam hpe, shanhte mung atsawm hkrak tup n chye ai lam, tsun dan wa ai. KNG |
