Myen a Lasang Awng Wa N-gawn Hpyen gaw, hpyen lahkawn nga
| Myen hpyen asuya a N-gawn Hpyen (Pyi-tu-sit) tai sai Lasang Awng Wa simsa lam hpung gaw, ndai July shata laman hpyen n-gun jat ai hku nna hpyen lahkawn ai lam ningnan ni galaw wa sai re. Hpyen lahkawn ai lam hpe, Myen masat jaw ai uphkang ginra rai nga ai, Jinghpaw Mungdaw mare daju Myitkyina makau, Mali Hka a sinpraw hkran na, Nawng Hkying, N-gan hte Gwi Htu pa na mare kahtawng ni hkan e madung dat galaw nga ai lam, dai buga masha ni kawn chye lu ai. Dai re majaw, ya ten, buga masha ni gaw Lasang Awng Wa a hpyenla n kam tai tim, kaning n chye di, hprawng shingbyi mung n mai rai, shanhte a magam bungli ni hpe hkrit maja let galaw sha ra nga ai lam, N-gan mare masha ni KNG de tsun dan wa ai re. Lai wa sai 2004 ning, Dukaba Lasang Awng Wa gaw kanu KIO/KIA kawn ga garan pru mat nhtawm, Myen ni masat jaw ai Gwi Htu Pa e laksan hpung langai hku tsap mat wa sai hpang, Myen a ga hpe tsepkawp madat mara hkan sa ra mat ai lam, Gwi Htu shiga lawk kawn chye lu ai. Dukaba Lasang Awng Wa a 'Myusha ni a matu' ngu nna woi awn galaw ai lam hpe shi a uphkang ginra na mungmasha nkau hkap la ai tim, nkau gaw hkrit ai majaw sha hkan sa masu nga ma ai lam, buga masha ni kawn chye lu ai. Ya ten, Lasang Awng Wa hpung gaw, shanhte uphkang ginra Gwi Htu Pa e, mare ningnan de ya nga ai zawn, mawdaw lam ni mung gram lajang let, hpun mailung ni shaw sha nga ai re lam, buga masha ni kawn chye lu ai. Ndai laman sha, Lasang Awng Wa na hpyenla ni hpe hpunau Karen National Union (KNU) hpe gasat ai majan de mung dat ai hta, hpyenla law malawng bai nhtang wa ai lam n nga ai majaw, hpyenla ni a kanu kawa ni ningbaw Lasang Awng Wa n'tsa gasan law law hte tsun garu san nga ma ai lam, Myitkyina buga masha ni kawn chye lu ai. Hpyenla kanu kawa ni gaw tinang kasha ni Karen majan e si mat na hpe grai myit tsang nga ai ten, Lasang Awng Wa gaw "hpyenla ni bai wa na re" nga nna sha, bai htang tsun nga ai lam, KNG kawn sagawn chye lu ai. KNG |
