KA-NI DUT SHABRA AI WA HPE AHKYAK LA AI LAM N NGA
September (23) Laban
Wunpawng Mungdan Shanglawt Asuya Up Hkang Ginra Sadung, Saga Pa mare kaw, Ka-ni Lauban Chyin-yu Tawng a masha rai nga ai, Sumlut Hpau Nye hpe KIO asuya ya Salang Kaba Lahpai La Bawk hte Salang Kaba Labau Bawm Kyang yan a lata hta September (19) ya shani lu rim la lai wa sai lam na chye lu ai. Rai tim, September (22) ya shani hta myen gumhpraw Sen (200,000Ks) hte sa tawngban ai shaloi lit nga Salang Kaba yan gaw, bai dat dat ya ai lai wa sai lam hpe mung matut na chye lu ai. N dai zawn Ka-ni dut shabra nga ai yen hpe lu rim la ai rai tim ya na zawn gumhpraw jaw nna sa tawng ban ai shaloi bai dat kau ya ai majaw lit nga Salang yen hpe Ka-ni a majaw hten za nga ai kashu kasha ni a kanu kawa ni grai myit n pyaw pawt ka-un nga ma ai lam shiga na chye lu ai.
Ya ndai lauban Chyin-yu Tawng gaw dai Saga Pa ginra na Ka-ni nanghpam lusha dut shabra ai lam hta na ginjaw hpa-awn kaba nan re lam matut nna chye lu ai.
Lai wa sai shata hta, Masat (8) hpyen yen dabang kaw Ka-ni dut mari galaw ai masha marai (6) hpe KIO kawn lu rim la ai rai tim, dat ya ai lam n nga ya du hkra Laiza Htawng kaw bang sharawng da ai majaw buga masha ni myit dik nga ma ai lam na chye lu ai.
Ya ndai kalang grau nna lareng Ka-ni chyawm tari wa hpe nan bai lu rim la ai shaloi gaw bai dat kau ya re lam ni hpe, seng ang Ginjaw Du salang ni n chye lawm ai kun? nga nna Buga masha ni a lapran ga san san nga ma ai lam na chye lu ai. Ndai gaw tara daw dan woi ai ni n tara ai magam bungli rai nga sai. Rim sai ngu sai kaw na gaw gumhpraw kade jaw nna mi sa hkye shaw tim n mai hkyam sa jaw ai, ginjaw de du hkra sa ra ai lam re, ya gaw sake manawn mayun kumhpa sha nna myin man lata let, lu su matsan nga nna, woi awn uphkang ai lai ladat rai wa ai majaw buga masha ni myit n pyaw nga ma ai nga na buga na myit su salang wa shi a hkam sha lam hpe tsun shana dan wa ai.
Dai majaw ndai manghkang hpe seng ang ai Ginjaw Salang ni kawn atsawm sha jaw hkrak ai hku ahkyak la daw dan hparan let, dai zawn rai Ka-ni dut mari ai ni hpe gaw mayun kumhpa kade mi jaw jaw n la sha ai sha, ja ja ahkyak la let hkum pat shingdang sa wa yang she anhte amyu sha ni Ka-ni tsin-yam majan kaw nna lawt lu na re nga matut nna tsun shana dan wa ai hpe na chye lu ai.
