CATHOLIC KARUNA NI SHATA MI (150,000,000) JAN HPYEN YEN NI HPE GARUM
September (23) Laban
Wunpawng Mungdan kata Wunpawng Mungdan Shanglawt Asuya hte Myen hpyen asuya ni gasat ai majan ai majaw Manmaw Ginwang kata hprawng yen nga ai hpyen yen tsin yam ni hpe Manmaw Catholic Karuna Bawng Ring Magam dap kawn Septembar shata a matu malu masha ni hte gumhpraw ni hpe garum ya lai wa sai lam shiga na chye lu ai. N dai zawn Catholic Karuna Bawng Ring Magam Dap kawn garum shingtau sa wa ai hta Nam Lim Pa, N Hkawng Pa, Pa Kahtawng, Lana Zup Ja, Bum Tsit Pa, Man Wing Kaba hte Manmaw, N Mawk, Shwegu hkan hprawng yen nga ai hpyen yen tsin yam ni hpe September shata a matu N-Gu buk (3000) jan, (masha hkum mi N-Gu Bye 6 chyen), sha sau joi (5,300) (masha hkum mi sau litter 1), Gumhpraw (shat mai manu masha hkum mi 6,000 Ks) hku garum ya lai wa sai lam shiga na chye lu ai. Hpyen yen masha yawng (10,565) hte a hkrat ang ai manu yawng myen mung gumhpraw (150,000,000 Ks) sen hkying mi manga tsa jan re lam hte shata shagu hpyen yen tsin yam ni hpe n dai zawn garum ya nga ai re lam hpe mung na chye lu ai. Du na October shata kawn gaw n dai zawn garum la lu na matu yak hkak wa sana re lam Manmaw Catholic Karuna Bawng Ring Magam dap lit hkam ni kawn tsun shana wai. Hpyen yen tsin yam masha ni a matu madung ra gadawn lam gaw lu sha re majaw myit ru tsang hpa re lam hpe mung matut na chye lu ai.
