SADUNG HTE LAHPAI LAPRAN KAW GASAT
August (5) Laban
Wunpawng Mungdan Shanglawt Asuya Dap Ba (1) Sadung hte Lahpai mare lapran KIA Dung (3) na myu tsaw share ninghkring ni hte myen hpyen hpung tat-ma (88) ni August (4) ya shani ka-ang daw hta gap gasat lai wa sai lam shiga na chye lu ai. N dai zawn gasat ai hta myen maga na (4) si hkrum lai wa sai lam hpe mung na chye lu ai. Matut nna Sadung lam yan de shamu nga ai myen asuya tat-ma (88) na hpyen la ni gaw mare masha ni kaw na lagu lagut ai lam hte kashun ai lam ni grai galaw ma ai lam buga masha ni kawn tsun shana wa ai. Mani August (4) shani mung Sadung gat n htoi rai nna, myen hpyen la ni gaw gat dut sha ai mung masha ni a gat rai ni hpe kam ai hku kashun la lai wa sai lam, manu jahpu hpyi yang shanhte a n hki hte bawm ni sha shaw madun lai wa ai lam mung na chye lu ai.
