MYEN DAWNGHKAWN LANG HTE SENG NNA HPYEI NEM LAIKA
Myen dawnghkawn lang hkrup ai hte seng nna tawngban dat nngai.
Ndai Myen dawnghkawn lang hkrup ai hte seng nna, KDF hku nna mung, woi awn galaw ai ni hku nna mung, shang lawm ai ni hkum ding dek hku nna mung, ngai Bawmwang Jadan Li hku nna mung Myen Asuya hpe madi shadaw ai lam tsep kawp nnga ai zawn Myen Asuya a dat kasa hku nna shang lawm ai lam mung nrai ga ai. Burma ngu ai mungdan a mying hte shi a dawnghkawn hpe jai lang nna anhte Jinghpaw Wunpawng amyu sha ni a htunghkying hte mabyin lam yan ni hpe mai byin ai hku nna mungkan de masha law law grau chye wa na matu lam tam shakut ai lam she rai ga ai. Shingre shakut ai lam hta e ladat shut ai rai na sai.
Nye a kraw dung kata kaw na Myen Asuaya hpe madi shadaw ai lam, yu kaba ai lam tsep kawp nnga ai zawn htawm hpang de mung nga na nrai ai hpe ga sadi jaw nngai. Amyu sha lam hpe galaw sa wa ai ten hta masa a majaw Myen dawnghkawn hpe lang hkrup ai a jaw e Nu Wa Hpu Nau, manaw manang ni hpe myit shut, myit n’pyaw, masin pawt lam hte yin la shut shangun na zawn byin tai shangun ai majaw yawng hpe kalang mi bai hpyi nem tawngban dat nngai.
Matut nna amyu sha lam yan shakut ai hta shada da hpaji jaw la ga. Ngai hpe mung matut shadum hpaji jaw la mi ngu hpyi lajin dat nngai.
Yawng hpe hkungga let,
Bawmwang Jadan Li
