LAIZA HKRAT SAI NGA AI SHIGA TENG A NI?
2012, July 24 ya shana na DVB-TV shiga hta "Laiza hkrat mat sai da!" nga ai shiga mi gale pru wa ai nga nna, jut shagu na ni phone hte san garu wa ma ai. Laika ka ai wa gaw daini sha Laiza Alenbum ntsa e, Shanglawt ni hte kabu gara mani shaga alum ala wora lera tsun jahta let, shana maga rai jang, Ja Nga Run Lusha Seng kaw hkru hkru kang kang jawm lu sha la nhtawm, ndai laika ka ai ten hta gaw, Miwa Gumsan Mungdan, Yinjiang mare, Yinmau hotel e rai nga nngai. Shing mi nga ai shiga a majaw, loi pyi n mai byin ai hpe chye chyalu, daini ting rau nga kau da ai Du Kaba langai hpe phone hte nhtang san gintan la hkra di nna lawu na hte maren maumwi langai hkai chyai ai gaw, phone mung kahtet, lata mung kahtet, na mung kahtet mat hkra rai saga ai.
Moi na Jinghpaw salang ni hkai ai mateng maumwi langai hta, kabung grai dum kut ai kahtawng mi nga ai da. Kabung dum lu na matu gaw masha si yang she mai dum ai. Masha si ai gaw n nga hkraw; kabung gaw hpa n dum rai kabung dum kut taw masai da. Raitim dai kahtawng e, nhtoi tsawmra mi machyi makaw hte yupra e kaleng taw nga ai la langai mi gaw nga ai da.
Kabung grai dum mayu ai mare masha ni gaw, du e bau langai hpra gali lang nna dai machyi ai wa a nta de lanyan sa ma ai da. Marai mi gaw, Hkau ni, nanhte ndaw e naw la nga mu; ngai shawng nhku de lanyan shang yu na. Machyi ai wa nsa hti jang gaw, ngai bau nsen sharat da na;. Shaloi nanhte dum let manawt let yan shang wa marit, ngu htet da ai da. Moi na Jinghpaw nta ni gaw asin amun re majaw, shinggan kaw na shang wa ai wa myi nau n mu; nhku e na na rawng taw ai wa mahtang gaw mu lu nga ai da.
Dai wa gaw asin amun re ai kata e machyi ai wa lama garai n si ai rai yang, dum chye kau na hpe mung hkrit let, lanyan masem yu ai nga yang, makau na shadaw hta arut hkrup nna bau nsen sharat kau dat sai da. Ndaw e la nga ai ni mung, machyi ai wa si sai majaw, bau nsen sharat ai rai sai ngu shadu let, "Darut... Ting... Darut...., Darut... Ting... Darut" nga nna kabung bau dum garu, ka manawt jahtau wau garu let yan shang wa masai da.
Shaloi machyi kaleng taw nga ai wa gaw, ngai si pyi n si yang me, kabung dum yan shang wa ai, ngu pawt let, kahkan rawt nna nhtu hte htim kahtam ai majaw, lanyan shang chyan mada ai la wa hpe kahtam sat kau nu ai da. Shing rai machyi ai wa mi n si tim, lanyan shang yu ai wa si sai re majaw, kahtawng masha ni kabung lu dum masai da. Machyi ai wa mung, kajawng htuk nna mai tsai mat nu ai da.
Dai hte maren, daina na lu ai shiga mung, Laiza hkrat mat jang gaw, kabung lu dum na hpe ra marit myit mada ai ni mi hkoi nga dam kun? Shut na lu yaw! Sadi ga. Laiza mare makau mayang Myen hpyen sawa ni nga ai nai htu hkan tam sha hkawm nga ai shiga mung teng ai. Laiza hpe gaw machyi kaleng taw nga ai wa hte mung sawn shabung mai nga sai. Daini ting gaw sinat ngoi ai nsen mung n na ga ai. Miwa hkran Laiza hte Yinjiang lapran taxi ni bus ni htaw htaw ya ya kahkrang nga ma ai. Myikyina Thainghmu Zay Yar Aung ngu ai wa, Laiza de she manap shat wa sha na nga ai ga mung na jin sai. Laiza gaw n hkrat nna Naypyidaw mahtang shawng hkrat na hpe tsang ya ai lu yaw! Kabung bau kayin gale dum ra na hpe mung naw shingran tawn yu mu yaw....
Shadan Awng
Yinjiang.
