KIO/KIA NINGBAW NINGLA NI HPANG DE
Ndai laman byin ai majan ni hta anhte KIA maga na hkala nba, hkrat sum, sinat laknak shayaw, shara tat kau ai lam ni ya sha ya sha byin nga ai shiga ni na lu ai majaw grai myit npyaw ai. Dai ni anhte Wunpawng myu sha ni gasat nga ai majan gaw Chyoi Pra ai majan re, Karai a majan re, dai hte maren anhte majan ninghkring ni mung chyoi pra ai hku sak hkrung ra na re ngu kam ai. Karai Kasang anhte hpang maga tsap na matu gaw Karai ra ai hpyen jaubu ni rai ra nga ga ai. Dai majaw tsa chyaru lu lang nang ai, tinggyeng shanang ai, nsan nseng sele seke num kaji gasup ai, ndai zawn re ningbaw ni hpe atsawm sagawn yu nna shawng lam ginra ni de bungli n-shatsam yang mai na re. Majan hpa-awn ngu ai gaw hpung rawng ra ai, hpyenla baw gun rai ai, nse nsa tinggyeng shanang ai ni hta hpung galoi rawng na? Karai hpa rai lawm na?
Dai majaw anhte tsaw ra kam hpa nga ai KIO/KIA ningbaw ningla ni e.... mai byin yang shawng lam ginra ni de laksan hpyen kai chyan ni hpe mung bang ra wa na re. Dai nrai yang majan pa hta byin ai gaw kaga, ntsa de bai tang madun ai gaw kaga rai wa chye ai. Dai majaw shawng lam ginra ni de mung laksan kai chyan ni hpe makoi magap ai hku dat bang sa wa yang mai na re. Hpyen awn du ni a lam hpe mung atsawm sha sagawn yu nna she shawng lam de lit shatsam yang mai na re. Hpyen la baw n-gun ai, nse nsa hte chyaru nang ai, tinggyeng shanang ai ningbaw ni hpe shaw kau nna kaja wa madu myit rawng ai hte myit san seng ai, tsa chyaru njai lang ai, sadi dung ai hte tara hkan ai hpyen awn ningbaw ni hpe bungli shatsam sa wa yang mai na re ngu mu mada ai.
Karai Kasang anhte hpang maga tsap ya na matu gaw ndai lam ni hta kaga lam (no other choice) n-nga sai. Awng Padang gaw Yehowa Karai a lata kaw she re. She njaw yang nmai lu nga ai. Bai, ya yang anhte a mung masa gaw shawng de sit yang mung di hkrat na tai, hpang de htingnut yang mung di hkrat na tai re masa kaw du wa nga sai. Myen a tau hkyen da ai mahkam kata kaw shang mat sai masa re ngu mu mada ai. Hkrum shaga bawngban ai lang law wa yang mung anhte matu tsang hpa hte hpyen wa ai a hkaw a hkang tai, bai tsep kawp nsa bawng jang mung mara lu hpa, rai byin taw nga sai. Dai majaw bawngban ai (snr) hkrum shaga ai lam hpe ndai daram kaw naw tawn da nna majan gasat ai lam hpe loi mi ninggam shatsaw, tat kau ai lamu ga ni hpe bai lu la ai hpang, nshung shang wa mahka she bai hpyen wa hte hkrum shaga yang mai na re ngu mu mgda ai.
Sumtsan Salang Wa
