KIO/KIA NINGBAW NINGLA NI HPANG DE
Hkawp hkungga ai KIO/KAI ningbaw ningla ni hpang de,
Gasat na dang na nre ngu ai ga hpe koi kau saga, anhte Jinghpaw Wunpawng ni gaw gasat ai kaw sha ram ai, myen hte baw nu shachyai hkat ai hta gaw Wunpawng ni gaw myit nau san seng ai majaw dang na yak ai, rai tim gasat yang gaw dang mai ai. Myen hte sa hkrum shaga magang myen asuya a mung masa gaw tsaw wa magang, shanhte a mung masa hpe sa shatsaw ya ai lam she rai nga ai, dai mung majan sum ai lam sha re. Mungkan man hta KIO hte kade lang hkrum sai 5 lang, 7 lang, 10 lang hkrum sai, "anhte asuya gaw simsa lam hpe grai ra sharawng ai majaw ndai zawn galaw sai, KIO she simsa lam hpe nra sharawng ai majaw ya du hkra nsim sa ai re" nga nna mungkan man hta ndau nna KIO/KIA hpe mi di chyip gasat shamyit kau na masing re. Dai majaw Myen hte hkrum shaga ai lang law wa magang anhte gaw mung masa hkrat sum magang, myen gaw rawt wa magang re.
Dai majaw myen hte sa jahta ai lam naw jahkring yang she mai na re, gan jahkring nna majan masing hpe loi mi bawnu nchyan shaw let n-gun dat nna gasat ai loi na ai hpang she bai jahta yang mai na re ngu ngai myu tsaw salang wa mu mada ai lam hpe tang madun dat ai rai.
