KIO/KIA MAGAM GUN NINGBAW NI HPANG DE
July (12) bat Mali
"Laiza Gasat Na Masing Nnga Ai" ngu nna lang hte lang myen asuya nigbaw ni tsun ai ga gaw kaja wa nga yang "Gasat Na" ngu ai rai nga ai, KIO/KIA ningbaw ni myen a ga tsep kawp hkum madat mu, simsa lam shaga ai gaw si mani ai ladat hte yawng hpe sat shamyit kau na ngu ai masing sha re. Dai majaw simsa lam jahta magang myen asuya dap ni Jinghpaw mung de jat magang, gasat poi grau laja wa magang re, myen hpe nkam na matu makam masham de na sara kaba ni lang hte lang tsun shadum nga ninglen shanang ai rai yang byin wa ai manghkang ma hkra ningbaw ni a lit rai na re, tara hkam tai wa na re. Mung masa ajet ngu ai gaw tinang amyu sha ni a lamu ga hte ahkaw ahkang ni hpe makawp maga, hpyen wa a lata na hkye shaw la lu ai hte lamu ga hpe ntat kau ai sha makawp maga da lu ai hpe she mung masa ngu ai re. Ya gaw tinang lu da ai lamu ga ni shani shagu tat hkrai tat, yen hkrai yen kau ya, dai hpe jet ai mung masa ngu na kun? Dai hpe awng dang ai naw ngu na kun? Myen asuya gaw maga mi de KIO hte simsa lam jahta nga ai rai tim maga mi de hpyen dap grai shagreng shajin taw nga sai re, myit n-san seng ai ladat hte KIO hpe simsa lam shaga nga ai re.
Lama na simsa lam awng dang mat nna gap hkat jahkring ngut ai hpang myen gaw shanhte nju ai KIO ningbaw ni hpe langai hpang langai mayun sat shamyit kau na sha re, dai daram jahtum na mahtai (final result) hpe chye nga ninglen myit naw galu nga na kun? Majan gasat ra sai, majan hpe astawm sha bawnu nchyan shaw nna Ntsa tsang Ningbaw ni nan woi gasat ra sai, ma ni hpe hkrai mung hkum kam, ntsa tsang ningbaw ni nan shang lawm ra sai. Hpyen masa hkrat sum yang mung masa hpa di sana, hpa galaw lu na, hkrat sum ai wa hpe mara ma hkra shagun mara ya na sha re, dai majaw majan mung dang ra ai, nmai sum ai. Tinang hkum tinang nau wa ladu lai hkra zen dum jaw dum rai wa yang mung hkrat sum na ten ni wa sai ga re, shagrit shanem let tinang kam ai Karai Kasang hta manoi let matut shakut sa wa ga.
