JARIT SIN DAP (1001) NI HPUNG UP HPE RIM WOI LA
June (7) bat Mali
Laiwa sai May (31) ya shani hta Hkungran Poi lamang langai mi hta shang lawm nga ai Hkalup Hpung, Hpung Up Sara Rev. Danggawq Ting Sau hpe Zahkung Ting Ying a Jarit sin dap masat (1001) ni kawn woi mat wai ai lam shiga na chye lu ai. Jarit sin dap masat (1001) hpe woi awn nga ai Detang Hkawng Kum gaw Sara hte grai hku hkau ai manang ni hpe sa hkalem woi la shangun nna hpyen dap du yang KIA hpe shiga jaw ai wa, masha n gun gahkyin gumdin ya ai wa re nga mara shagun nna jawm a dup zingri lai wa sai lam shiga na chye lu ai. Rev. Danggawq Ting Sau hpe ya du hkra dat ya ai lam n nga ai sha n ga, gara kaw tawn da ai re hpe mung n chye ai majaw Sara a nta masha ni hte, hpung masha ni gaw myit ru tsang pu nga ai lam, buga masha ni yawng mung grai myit n pyaw nga ma ai lam matut na chye lu ai.
