AUSTRALIA WAGGA WAGGA MARE HTA JINGHPAW LAIKA SHARIN
June (28) bat Mali
Australia Mungdan NSW mungdaw Wagga Wagga Mare kaw du nga ai Jinghpaw Wunpawng Myusha ni kawn shawng lang na hkrum zup bawngban hpawng hpe June (26) ya shani Turvey Park law na Lagwi ni a nta hta galaw lai wa sai lam shiga na chye lu ai. N dai bawngban hpawng hta madung hku nna Jinghpaw ma ni hpe Jinghpaw Laika sharin ya mat wa na lam hte seng nna bawngban ai re lam hte Myu Sha ni marai (40) sa du shang lawm lai wa sai lam shiga na chye lu ai. June (27) ya shani kaw na Jinghpaw ma ni hpe Jinghpaw laika sharin ya hpang wa sai lam hte jawng ma ni yawng marai (12) sa du sharin hkam la nga ai rai nan shara lahkawng hta garan nna shayin ya nga ai lam shiga na chye lu ai. N dai zawn ma ni hpe Jinghpaw Laika sharin ya ai a yaw shada lam gaw Maigan de chyam bra nga ai Myu Sha ni tinang a laili laika, myu htunghking hpe grau chye tsawra manu shadan wa lu na hpe yaw shada le ya na zawn ma ni hpe Jinghpaw Laika sharin ya wa ai re lam hpe na chye lu ai.
