MYITKYINA ZUPHPAWNG HTA
May (22) bat Lahkawng
Nhtoi 22-5-2012 ya shani, Myitkyina kaw Thein Zaw woi hpawng ai mungdan simsa lam zuphpawng hta Myitkyina mare na mungchying sha myit su salang langai rai nga ai Slg. Damya Hting Nan gaw lawu na hte maren tang madun lai wa sai lam na chye lu ai.
"Hkawp hkungga ai du salang ni e, daini anhte hpe ndai zawn hkrum zup lu ai majaw kabu chyeju dum ga ai. Yawng chye ai hte maren, anhte a Jinghpaw Mungdaw kata gasat gala majan byin ai gaw laning mi rai wa nga sai. Majan gaw grau grau laja lana rai wa nna, lahkawng maga hkala nba si ai mung hkrum ai. Mungchying shawa ni mung ruyak tsinyam myu hkum hkrum sha nga sai. Ning rai byin nga ai lam hpe yu yang, kadai jasam maigan mung n lawm ai. Kala, Miwa, Inglik, Amerikan n lawm ai. Anhte shada da hkrai sha gasat gala hkat nga ga ai. Gasat gala ai hta lang ai laknak ni mung, laknak kaji kaba, nbung li du hkra, Chemical laknak du hkra lang nga ai majaw, gaja wa maigan hpyen hpe gasat ai zawn, mungkan majan she byin wa ai zawn rai nna, si hkala ai ni mung, anhte mungchying shada da hkrai sha rai nga ga ai. Dai re majaw, ning re ai majan hpe lawan shazim nna ngwi pyaw simsa ai munghpawm mungdan byin tai hkra lawan sharai la ra sai ngu, hpaji jaw tang madun dat nngai."
Slg. Damya Hting Nan ndai zawn tang madun ai hta Chemical laknak lang n lang nang mu nni? ngu nna san ai shaloi, "Ngai nan myi chyaw gaw ganang na mu na! raitim mungdan ting tsun garu jahta nga sai majaw, yawng hpe san yu mu," ngu htan wu ai da. Shaloi seng ang du ni gaw, "Ndai lam mungkan ting hpe tsun ndau kau ai hku ang mat sai. Mungkan ting chye kau ya sai," nga nna grai myit n pyaw shajang ma ai lam shiga na lu ai rai.
