MUNGSHAWA DINGLUN NSEN AMYU MYU
KIO hte Myen Asuya ni a lapran masum lang na bawngban hpawng ngut ai hpang, Jinghpaw Wunpawng mungshawa ni a dinglun ai nsen ni gaw, mai kaja masa (Positive idea) hku tsun shaga ai hta ninghkap masa (Negative idea) hku tsun shaga ai mahtang grau law ai hpe mu lu ai. Hpa mi nga tim, 'Positive' hte 'Negative' lahkawng maga hta, jet ai myu tsaw mung tsaw masha ni a nsen lawm ai zawn, jasam amyu hpyen wa maga na masha ni a nsen mung lawm chyalu rai nga ai. Lam mi hku nna mungshawa ngu ai gaw, wanglu wanglang tsun shaga dinglun nga ga ai raitim, lahkawng maga na ningbaw ningla ni gaw, laknak hte gasat hkat ai hta bawnu hte gasat hkat ai mahtang grau laja lana rai taw nga malu ai.Sadi maja ra ai lam langai gaw, 'Lapran Salang' tai nga ai ni re. Shawng de galaw lai wa sai Lapran Salang ni mahkra gaw, mying hten nna hpungdim dat ra ai hkrai re hpe mu mada ai. Dai zawn Lapran Salang ni mying hten hkrum ai ningpawt hpe bai gawn yu yang, KIO ni jahten ai n re sha, Myen hpyen wa shi a sumbu masha n byin byin hkra gunglau ai hpe n lu tawt lai kau ai ninghkan mying hten hkrat sum lai wa sai hpe mu mada ai. Tinang langai mying hten hkrum ai gaw ahkyak n rai; mungdan hte mungshawa ni a gam maka hpe jahten sharun dingbai dingna jaw ai lam ang nga ai.
Ndai lang na Shweli zuphpawng shiga ni hte mabyin lam ni hpe san sagawn dinglik yu yang, Myen hpyen wa a maw lanyet shachyai ai gaw, mala la hkyet sharung rai nga ai hpe mu mada ai. Shing rai nga ai ntsa, Jinghpaw Wunpawng shawa ni a dinglun ai nsen ni mung, KIO hpe mara shagun matsa bun lu ai gaw, arawng n rai nga ai zawn, amyat mung n rai nga ai. Dai hte maren, "Nat mu, sat mu, shakrip mu, adawt mu, hkum shayawm mu," nga nna grang ai nsen hte marawn shagu mung, tang du ai n-gun jaw madi shadaw lam de n ang ai hta n-ga, ladat jaw jaw myit maju jung let galaw ra ai bungli hpe myit mang sumru atsam shayawm kau ya ai zawn byin shangun chye nga ai. Simsa lam ngu ai gaw, awng padang lu ai simsa lam hte asum jaw ai simsa lam ngu nna hpan lahkawng nga ai. Ya ten gaw, awng dang sai mung garai nga ai zawn, asum jaw kau sai mung garai n rai nga ai. Naw sha-ip ra ai, naw ginhtim ra ai, naw shim ra ai, bawnu hte naw gasat ra ai aten hta ang taw nga mali ai.
Ga shadawn langai tsun ga nga yang, maiwang jawm (shan shachyut) sa ai shabrang wangan hpung ni gaw, lam hkan e masha hkrum yang, anhte shan jawm sa ai lam kadai hpe n mai tsun dan ai, ngu nna shada ginhtim hkat ma ai. Rai tim loi ngawk ngawk re ai la langai gaw, lam e masha hte hkrum jang, shakawng mayu ai myit hte, "Anhte shan jawm sa ai n rai ga ai lu!" ngu nna tsun gapawk dat ai da. Dai ga gaw, "N rai ga ai lu!" mi nga tim, gaja wa rai taw ai hpe shadawng kau ai hku ang mat sai. Shim nna galaw ra ai bungli dan dawng mat jang, masing hten mahkam hpuk mat chye nga ai. Jiwa ni woi galaw ai hkwi lu hkwi sha lam hta, nga hkwi sa yang, sha-it hkap sa yang, u hkam hkam sa yang, shan gyam sa yang, grai shim let she woi galaw chye ma ai. Kaba ai ni nga madim galaw nga ai aten hta, nta e nga ai ni kaihtum pyi n sharat hkra sadi koi gam ai lai ladat ni galaw chye ma ai.
Dai hte maren, hpaga yumga amu, mungmasa amu, hpyen majan amu mahkra hta machyi shim ai lam nga ra ai. Sumtsaw sumra lam mi rai rai, num wawn num la lam mi rai rai, garai n awng dang ai laman shim ra ai aten ladaw langai nga ra ai gaw, shingra tara nan rai nga ai. Daini KIO woi awn ai lam hta, ya jang myit hkrum lata masat ka ai lam hpa garai n nga ai hpe mu mada ai. Shada da bawnu majan pa e naw gumrin hkat nga dingngam re majaw, n-gun jaw ai ni, dinglun ai ni mung, hkrudu zawn sumnung nna lapu zawn zai rawng ra nga ai.
Moi Inglik kaw shanglawt hpyi yang, nanhte Jinghpaw ni Myen hte shanglawt rau la jang, nanhte hpe Myen ni dang sha na re, nanhte Jinghpaw ni gaw, Myen daram hpaji garai n hkum ai, ngu tsun ai shaloi, Sama Duwa gaw shi a nhtu shaw nhtawm, Myen ni anhte hpe dang sha jang, azat kau na re, nga nna grang dakat lai wa sai da. Daini nhtu hta grau ai sanat laknak hte shaning 50-60 gasat tim n dang lu nga ga ai. Dai re majaw, ya rai tim, lachyum n pru ai grang dakat ga hpe ngai hte hpawn, hpu nau ni yawng atsawm dinglik yu nna she tsun shaga ra nga ga ai. KIO gara hku dawdan ai lam shim da ai bungli hpe anhte chye ging chye mai ai shani chye wa lu na kam ai. Anhte hpe woi awn na mungmasa hpung gaw, KIO chyu sha re, ngu ai hpe ngang ngang jum manat da na hte, anhte hpe karum lu ai awng padang jaw lu ai wa gaw, Yehowa Karai Kasang chyu sha re, ngu ai hpe ja ja kamsham n-gun la na gaw, anhte a lit madung rai nga mali ai law.
Rawt Malan Maibyit
12/3/2012
