GWI HKANG WA SHAMAT, MYEN A LADAT
Jinghpaw Wunpawng buga ginra ni hta, Chyurum sha ni a moi prat janat labau shang masat, tsun kajai hkrat wa ai hkang ni mahkra hpe shamat shaprai kau wa nga ai Myen satan hpyen a maw lanyet gaw, n hkam sharang lu na madang de du nga sai.Mali hte Nmai mazup madim hpe dawm kau sai, ngu ai gaw tsep kawp masu ai sha re. Grau grau she shagreng wa nga dingyang rai malu ai. Sakse sakgan pra pra mu mada lu nga ai. Ndai lam hte seng nna ja ja matut ninghkap shaja ra nga ga ai.
Shaning 60 jan grin nga sai Karing Naw Sa-ra hpe mung zing la kau manu ai. Kade n na yang, gawngngu mung shadun na rai malu ai. Jinghpaw ni galaw da ai hkang mahkra shaprai kau ai lam rai sai. Htawm hpang de gaw, Jinghpaw ni a buga re, ngu ai labau pyi tam shamat na rai saga ai.
Shawng de Nbawn Lup ngu ai shara hpe, Shwezet ngu shamying galai kau sai. Dai gaw, Manhkring hte Kawa Hka lapran e rai nga ai. Nbawn Jasen Labang Duwa hpe lup makoi ai shara re. Jinghpaw du ni a labau shaprai kau na masing rai malu ai.
Kade n na yang, “JINGHPAW MUNGDAW” ngu ai hpe mying galai kau na mayun hkyen lajang nga masai. Jiwa ni tam da ai Jinghpaw Mungdan gaw, Jinghpaw Mungdaw madang de yu hkrat wa nhtawm, ya gaw mungdaw pyi bai shaprai kau na madang rai wa sai hpe, n kam hkum rai; loihkring she na kajawng na ga ai. Jiwa ni a lata amu mahkra Myen dangchyang ni shaprai kau ya wa sai. “Gwi hkang wa shamat” ngu ai baw nan rai sai.
Anhte a buga kata, kahtawng mying, mare mying, mahkrai mying, lam mying, dan dawng ai masat masa ni mahkra hpe Myen mying, Myen labau, Myen gawngngu hkrai shatai kau ma wa masai. Ndai zawn re ai n shawp dik ai Myen ni hpe kawa di shadu nna maidang hkan mata nang nga ai Jinghpaw ni mung naw nga taw nga ai. Tinang amyu hpe dut sha ai, tinang buga hpe hpya sha ai, amyu mungdan a ntsa e sadi run ai ni rai nga ma ai.
Majan ngu ai gaw, madat yang she pyaw ai; ta tut hta loi ai n re. Majan hpe kadai mung n ra ai gaw teng ai. Kade n ra sharawng tim, koi yen n mai ai sat lawat pru wa jang, majan gasat ra ai gaw shingra tara rai nga ai. Daini Jinghpaw Wunpawng sha ni gasat nga ai majan gaw, tawt lai roi rip dip gamyet shang wa ai maigan hpyen hpe gasat ai majan, tara ai majan rai mali ai. Myen ngu ai hpe n-gup aga hte tsun nna n lu ai. Myitsu ai kyang lailen madun nna n lu ai. Chye na la ai baw n rai ma ai. Gasat nan gasat nna gawt kau ra ai ni she rai ma ai. Jinghpaw Wunpawng sha ni a rawt malan majan gaw, tara ai majan re. Tara ai bungli hta Karai Wa lawm nga ai. Anhte a Awng Padang Yehowa Karai Kasang nan rai nga ai.
Loimye Bum
22/3/2012
