KIO/KNO NINGBAW NINGLA NI HPANG DE
Ngai gaw, mung masa la nrai nngai. Mung masa hpe maram dinglik na matu laksan hpaji mung nchye nngai. Raitim, amyu sha ni a lam hpe myu tsaw myit, mung tsaw myit hte myit masin hkrat nga ai wa rai nngai. Lawu e tang madun ai lam ni hta shut shai lam lawm yang, mara dat ya na shawng lajin nngai. Ngai mu mada, hkam sha lu ai lam hpe tang madun ai she rai li ai. Dai ni na majan hta, KIO/A tsap ai shara gaw.., 1947 ning Panglung Ga Shaka rai nhtawm, Myen Asuya tsap ai gaw, 2008 Constitution rai nga ai hpe mu lu ai. Ya ndai 2008 Constitution a ntsa mungdan kata na ningmu, mungdan shinggan na ni a ningmu ni loi li galai shai wa ai hte ta tut galaw sa wa nga ai lahkam ni hpe yu nna, 2008 Constitution gaw yawng a matu kaja nga ai ngu, mu lu ai masha ni law wa mai ai. Ndai zawn mu mada ai hta ningpawt nna, dai ni KIA gasat nga ai majan gaw, shut nga ai, ngu ai ningmu de gale wa mai ai hpe maram lu ai. Hpa majaw nga yang, ya hte NLD Aug San Su Kyi ni party registration galaw na hkyen wa ai shaloi, Myen mung the Asia mungdan n kau mi a lam specialize galaw ai wa Georgetown University kaw na David I. Steinberg hpe gara hku mu ai lam san yu ai shaloi, shi hku nna, NLD gaw, party registration galaw mai nga ai, ngu bai htan nu ai. Tsun mayu ai gaw, law law ni ninghkap tawn da ai, NLD shi nan mung ninghkap tawn da ai 2008 Constitution gaw gau ngwi ngwi sharai hkap la wa ai de sa wa ang sai, ngu dinglik lu ai.
Ndai kaw madung tsun mayu nngai gaw, Aug San Su Kyi gaw myen mung masa galaw nga ai wa re majaw, Thein Sein hte hkrum jahta ngut ai hpang shi a myit ai lam ni galai wa sai lam nga nhten! Shi a myit hta, ethnic masha ni matu shara nau nnga lu ai. Ga shadawn, Hilary Clinton hte shi nta wang kaw, Press Conference galaw ai kaw shi tsun ai ga langai mi gaw, แแ္แแ္แုိแ္แုိแ္แုိแ္ေแแဲ့ แုိแ္းแแ္းแားแแ္แแ္แုိแ္ แกแြဲแแกแ
แ္းแ်ားแกေแျแแ့္ แกแแ္ႏုိแ္แံုး แกျแแ္แံုး แกแแ
္แกแแ္แแ္แ
ဲแแแ္ nga tsun nga ai. Ndai ga hta, gasat gala shazim na lit lu ai gaw, laknak lang gasat nga ai ethnic hpung ni mahtang re ai hku nsen manaw pru nga ai. Gasat gala shazim ra ai gaw, Thein Sein asuya re hpe shi n tsun nga ai. Kaga sakse ni mung nga nga ai. Dum ai ni mung dum na re. Aung San Su Kyi gaw, ethnic people ni a matu kade myit n myit ngu ai ahkyak ai lam gaw, Mungkan gaw Su Kyi hpe mahtang myit maju jung nga ai. Shi hpe kam nga ai. Dai majaw, ning re masa lam kaw, anhte tsap ai shara hpe mungkan e n mu ya, Myen asuya wa hte Su Kyi a jawm pawng maw mawn ai lam hpe sha mungkan e mu ya rai jang, anhte gaw, tara n shang ai wuhpung wuhpang zawn tai mat lu, mu mada hkrum lu na lam nga ai. Ya, Myen asuya ningnan a ladat langai mi gaw, media hpe media hte bai gasat ai ladat rai nga malu ai. Gashadawn, President Thein Sein wa a shingdu hpaji jaw wa kadai hpe shaga tim, bai hkap htan shaga ya nga ai. Shi laika ni hta mung, KIO gaw namhpam lusha lagu lang nga ai lam ni masu shi ga ni ka shabra nga ai. Dai majaw, ndai laika ka ai lam madung gaw, KIO/A, KNO ningbaw ningla ni hku nna, anhte a tsap shara hpe atsawm sang lang dan ai laika langai ka nhtawm, UN rung de, Obama hte Hilary Clinton ni hte kaga ahkyak ai rung ni de lawan shabra ra sai ngu mu ai.
Ga shadawn, simsa lam ngu ai shaloi, Myen a simsa lam gaw hpa hpe tsun ai, anhte ra sharawng ai gaw, hpa baw re, ngu ai zawn re ni hpe atsawm sang lang ai ndau shabra laika hpe lawan ka ra sai, Myen hku, Jinghpaw hku ka ai laika ni mung gaw nga nga na sai. Raitim, English hku ka nhtawm, mungkan a ningmu hpe lawan jahpra dan ra sai, ngu mu n nngai law. Shing n rai yang, maga mi de na propaganda a majaw, anhte hpe shut ai hku mungkan e mu mada kau na tsang shara nga ma li ai. Anhte amyu sha n kau mi nan mung, myen hpyen wa a lagaw lata tai let, shanhte a ga manaw nsen hpe ndau karum nga ai ni law law nga ai mug yawn hpa kaba rai nga mali ai. Ndai lam ni yawng hpe mungkan de, anhte gaw tengman ai masa lam ntsa tsap nga ai lam lawan ndau shana ra sai law.
KIO/A hte shawng lam majan pa na myu tsaw share shagan ni yawng hpe teng man ai Karai Kasang tut nawng bau sin makawp maga u ga law.
Tsawra let,
Nhkaibum Shalawng
