MYEN ASUYA KAWN MYITKYINA MYI HPRAP WAN N SA NA HKU DA SANG GALAW
November (3) bat Mali,
Wunpawng Mungdan Shanglawt Asuya a Buga Company kaw na Jinghpaw Mung Myitkyina mare kaba de jaw nga ai myi hprap wan n sa ai dai ni hte (3) ya rai sai lam na chye lu ai. N dai zawn myi hprap wan n sa mat ai lam a madung gaw ya KIA myu tsaw hpyen hpung ni hte myen tai hpyen ni gap gasat nga ai Gara Yang hte Shwe Nyaung Pyin mare lapran na wan sumri hte transformer langai hpe myen tai hpyen ni kawn da sang gap jahten kau ai majaw re lam KIO Ginjaw Salng ni tsun shateng wa ai. Myen hpyen asuya hpyen la ni kawn n dai hku galaw ai lam gaw,
1. Mali hka wan jak na myi hprap wan gaw KIO a shang gumhpraw hpe madung madi shadaw ya nga ai re majaw.
2. Myitkyina de wan n sa mat jang mung shawa masha ni Shanglawt Asuya hpe mara shagun wa na re lam,
3. Myitkyina mare kata n sin chyip magang myen asuya hpyen dap ni a matu hpyen masa shamu shamawt ai lam hta grau na tang du hkra lu galaw na hte lak nak ni hpe mayun shalai lu na matu re lam,
N dai lam ni a majaw ya na zawn gap jahten kau ai re lam KIO ginjaw myit su salang ni kawn tsun wa ai.
