JAPAN DU MYU SHA NI N GUN MADUN NINGHKAP
22 October, 2011 (Bat kru) ya, (2:00pm ~ 4:00pm) lapran, Tokyo mare Shinagawa Myen Mungdan Sumtsan Salang (Hkanse) rung shawng kaw, Network For Democracy in Burma (NDB) Mung masa wuhpung ni kaw nna woi awn ai hte, Japan Mung du Mung masa wuhpung ni hku nna, Myen Mungdan a Maigan Sumtsan Hkringmang U Wunna Maung Lwin du nga ai ten hta, Myen Mungdan kata kaw ya hkyak hkyak byin nga ai shinggyim ahkaw ahkang lam ni hpe shadut hpyi shawn shamu shamawt ai lam ni hpe galaw lai wa masai. Grau nna Democracy mungdan hkrang masa hte maren, mungdan kata na dinghku majan ni hte sharen da hkrum nga ai mung masa bawng masha ni hpe ya jang shazim shalawt dat na lam, kaga mung masa lam yan ni hpe shadut hpyi shawn lai wa masai. Salang Howa Zau La (KNO-Japan, Nt. Ningbaw-II ) hku nna mung, ya hkyak hkyak Wunpawng Mungdan kata kaw Jinghpaw Wunpawng Amyu sha ni ta tut Shinggyim ahkaw ahkang hkrat sum ai hte shani shana hkam sha nga ai mabyin ginchyum ni hpe n-gun mi alu tsun sanglang tang madun lai mat wa sai lam chye lu ai.
