CHYAIHKU SAKSE (BC. 300 ~ 200)
Oh… goi ya daini…..
Shinggyim mungkan pin-ra
N tsawm dik la maka,
Mungkan labau lungpa
Top ( 1 ) hta grau Myanmar,
Shinggyim ahkaw ahkang kata
Hkristu tsaw myit bala,
Yubak shingnoi htingga
Dubawng tauba pyet hkra,
Hkanghkyi Rawngba myit masa
Sagu la hpyi hpun asuya.
Goi law…..
Amyu kaji Taiyinta
Mungchying amyu sha yawng hkra,
Shinglet balen latsa
Sai lam achye mya mya,
Tara rap-ra n nga
Sat nat roi rip hkrum sha,
Wenyi majan pin-ra
Myu htum masing kaba,
Nawng hkyeng panglai kata
Nyep myiprwi si deng latsa.
Aga…..
Mungchying Nammukdara
Prat pra hkaleng latsa,
Sumsing hkuwawt chyinghka
Madu chyan yu kahpra,
Kraw sung sin dai pala
Wan hkat ningwu chyu mya,
Pungkum myiprwi ra ra
Madai ka-ak hkrap Wa,
Nammukdara grau hkra
Goi sha kaning di sana.
Oh…..
Wunpawng mungkan chyam hkra
Madu hta langai chyu sha,
Jaw prat shawng lam gam maka
Padang ninglaw chyinghka,
Myen hpyi tai hpyen amyu sha
Myit malai hpang hkrat ngam na,
Shada gawmai gawsha
Kraw dung myiprwi sai ga,
Myu tsaw mung tsaw myit masa
Daini dumhprang yawng hkra.
Jiwoi Jiwa Majoi Shing-ra
Nang shoi nang sha ga n kra,
Pu gang sin dun nau pa pa
Sin hpraw salum gumdin kaba,
Nga pra maden yu hkrat wa
Chyaihku sakse shadaw lungpa,
Rawt malan majan hkrun lam kaba
Chyaihku lungpa yawng hpai ra,
Myit hkrum panglai htawk dang na
Wunpawng Mungdan gaw de ga.
Bumwa Hkri Ma
Fuji Majoi, Japan.
27.10.2011 ( Bat mali ya ).
