DAP BA (4) SHIGA
September (28) bat Masum
Wunpawng Mungdan Shanglawt Asuya, Sam Mung daju Dap Ba (4) shara dingsa hpe KIA ni gan yen da ai lam shiga na chye lu ai. N dai zawn yen ya ai lam gaw myen tai hpyen ni a myawk kaba ni hte nau gap sharu bun ai majaw re lam, rai tim myen tai hpyen ni Ba (4) shara dingsa de rai nlu gahtep shi ai lam shiga na chye lu ai. Myen tai hpyen ni gaw Ba (4) n pu na Myu tsaw mung tsaw share shagan ni hte gasat ai hta 81MM ni hte sha n dang wa ai majaw ya ten 120MM laknak kaba ni hpe grai htaw shakut nga ma ai lam, gasat ai lam gaw ding yang rai nga nna, n dai majan hta myen n law htum (200) jan hkrat nna hkala ai mung grai law sai lam, myen hpyen la mang (60) jan hta la n ngut ai majaw tawn kau da ma ai lam hte hkrat sum ai myen hpyen la law malawng gaw a sak n ram shi ai ma ni re lam hpe mung matut chye lu ai.
Wunpawng Mungdan Shanglawt Asuya KIA maga na gaw dai ni du hkra share shagan (6) hkrat sum nna (3) hkala hkrum lai wa sai lam mung Dap Ba (4) na Du Salang ni tsun shana wa ai.
