WUNPAWNG MUNGDAN NINGBAW NINGLA NI HPANG DE SHAGUN LAIKA
De,
Dap Awn Daju
Wunpawng Mungdan Shanglawt Hpyen Dap (KIA)
Lai Za
Wunpawng Gumrawng Gumtsa Mungdan
Nhtoi: 12.07.2011
Ginlam : Gap Jahkring Jahta Hte Seng Nna Tang Shawn Ai Lam
Tut e kam hpa ai hte hkungga ai, amyu sha, mung shawa ni a KIA Dap Awn Daju hpa-awn ni hpang de, ya ten mungdaw hpyen asuya ni hte jahkring hkring hkrum jahta ai lam hte seng nna tang madun, lajin dat ai.
1. Gasat majan gan jahkring na matu, tinang Shanglawt hpung kaw na lajin tawn ai hpyen lam, mung masa lam yen ni hpe myen hpyen asuya maga de ta tut hkrang galaw sa wa na nre hpe jahkring hkring hkrum jahta ai lam matut n’galaw yang kaja ai.
2. Akyu npru ai jahkring hkring hkrum jahta ai marang e hpyen asuya gaw, tinang shanglawt ni a hpyen jasat masa gawng kya ai lam ni hpe akyawk chye la lu wa ai hte shan hte a amyat lu lam hta arang bang lawm ai hku rai wa ai. Teng sha byin mai ai nbyin mai na gaw lai mat wa sai hpyen masa mabin, mung masa labau mabin sak se nga nga ai law.
3. Hkrang shapraw ai lam n galaw ai sha hkrum jahta ai lam gaw, shanhte myen asuya maga de na gasat jahkring mayu ai myit rawng ai ngu ai hpe mai gan mungdan ni de htawng madun masu ai rai nna mai gan mungdan ni madi shadaw wa na matu ntsa lam galaw madun dan ai sha rai nga ai.
4. Ta tut hkrang gran wa na hpyen masa, mung masa nnga ai hpe hkrum jahta nga ai rai yang; hpyen masa lam hta myit shayaw kau ya wa lu ai, mung masha a kam hpa ai lam yawm wa ai hte hpyen hpung ni a lapran, hpa-awn ni a lapran, mung masha ni lapran ntsen ai lam, kam shut wa ai lam hpe sha shabyin ya nga ai.
5. Hkrang npru wa ai lam jahta ai gaw, htingbu mungdan ni a man, amyu baw sang dap hpawm ni a man e ma gasup hpyen masa, mung masa re hku mu wa ai majaw sari yawm mat wa, kam hpa lam nnga wa lu nga ai.
6. Ya ten, tinang shanglawt ni a mung masa gasup na hta hpyen masa gasup dang la lu na sha grau ahkyak ai nga ai law, akyu amyat lu na matu aten re.
Tut Hkungga let,
Zau Hkum
