MALAYSIA DU MYU SHA NI A ZUPHPAWNG
June 19 Labang shana de hkying (6.30) ten hta Malaysia Mungdan kaw du nga ai Jinghpaw Wunpawng Myu Sha ni kawn Kanu mungdan kata byin nga ai majan hte seng nna Zuphpawng hpawng lai wa sai lam chye lu ai.
N dai zuphpawng hta Malaysia mungdan hta du nga ai Myu Sha myitsu salang ni hte Myu tsaw Mung tsaw myit rawng ai Ramma Shayi Shadang sha ni sa du dung lawm nna, tai hpyen myen asuya hte majan hpaw nga ai Kanu Wunpawng Mungdan Asuya (KIO/KIA) hpe gara ladat hku madi shagaw garum sa wa lu na lam ni hte majan a majaw jam jau nga ai Myu Sha ni hpe gara hku garum sa wa na ngu ai lam ni hpe bawng bang jahkrup wa ai lam chye lu ai.
Matut nna Mungdan kata byin nga ai lam ni hpe mungkan mungdan de Media ladat hku shachyam shabra na lam, Maigan mungdan hkan nga ai myen asuya sum tsang dakkasa rung ni hpang de n gun madun na hte ninghkap laika shawn na lam ni hpe mung hkut hkut nai nai jawm jahkrum bawng bang sa wa ai lam na chye lu ai.
Ndai gaw zuphpawng galaw ai sumla ni re.
